حوار زجلي للشاعر القدير مدين رحال
حوار زجلي عفوي تم في المصادفة بيني وبين الصديق الشاعر زاهر حيدور
♡♡♡♡♡♡♡♡♡♡♡♡♡
١-البداية : مدين
-------------------
عا بابها دَقّيت قالتلي ارجاع
عن طيشك ولا تسلك دروب الضياع
جاوبتها جهل الاربعين ابتدى
والروح عطشت والقلب ع الحب جاع
---------------------------------
٢- زاهر
-----------
جايع قلت والجوع بالقلب انغمس
خايف عليك وعلى إسمك ينشمس
مدين إذا بيجوع نهداتو شكا
قلبو انوجع ياناس بالحب اندمس
------------‐----------------
٣-مدين
------------
ياريت إسمي ينشمس للمعجبات
وإروي غليلي بعمر عالخمسين فات
حتى بغرامي صير اكسر جوعتي
وشريان قلبي ينبض بْ حُب البنات
--------------------------‐---
٤-زاهر
-------------
مسكين مدين والحقيقة بتوجَعو
ناسي بأنو صار خافت مطلعو
عَتّقت عمرك و البيان بموضِعو
وخمسين عام العمر قلت مجَمِعو
شو بينفع الشريان لو ينبض معو
رح تقتلك دقات قلبك لو دعو
جبت البنات وجيت حدي يا فقير
صاروا البنات خدود وشك يصفعو
-----------------------------
٥- مدين
------------
لَمّا الصبية تصفع الخد الرقيق
كرمال لمسة ايدها تطفي الحريق
قالت يامدين ع الصبح بكير فيق
وانزل لحتى نلتقي بْ أقرب طريق
ونمشي ع درب الجامعة بمظهر أنيق
ونقلع العين الحاسده ب ظرف الدقيق
وناكل سوا حبات عنقود الغرام
تَ الحب يعطي شْفافنا رهجة وبَريق
--------------------------------
٦- زاهر
------------
حاجي على الموضوع ترسملو نفاق
وتُعبر على رْوَاق المحبة بلا رَوااااق
جاية تا فَيّق غَفلِتك بعد الشِقاق
وأفضح حقيقة مبكلة قبل العِناق
ما في صبية بتقبلك تمشي برِوَاق
كلو خَدِيعة ومُكر وجنون وطلاق
خطية إنت مسكين في عندك نقص
ما بِيندَمَل هالنقص بغضون الرِقاق
------------------------------
٧- مدين
-------------
عندي نقص بالعاطفه وْ مابهملو
وعندك نقص بالعقل صعبه ت كَمّلو
أيّا حقيقه فْضَحت ياشب الحلو
المكتوب فيك بينعرف من أولو
وعاسيرة المَكر اللي زاهر حَوّلو
هيدا الكلام السافر بيرجع إلو
اتفضل يا زاهر روح جمهوري اسألو
استفتي الصبايا اللي بْ قلبي توغلوا
بتسمع حكي منهن بيكسر خاطرك
مدين ع راسك تاج لازم تحملو
---------------------------
٨-زاهر
------------
بلا ما إسأل الجمهور رح بسألك
شو في إلك عنا وفا تا نِحمِلك
ختيار إنت وبالختيرة لسانك علك
وحق الصبايا مضَيّعو بليلة حلك
ما فيك تاج تكون يا عاشق سلك
درب الحقيقة مضَيّعو وجسمك هلك
لا ا تقترب درب الصبايا مو إلك
هيدي دُروب مفَتّحة لعاشق مَلَك
خِبرة و شباب و جاذبية بمطلعو
مِنّو الصبايا تْقَرَبو و قالو مَلَك
--------‐--------------------
٩- مدين
-------------
رح جاوبك شو صار من بعد المشيب
هيبه و وقار ب شيبتي ونفحات طيب
بتقول شو عندي وفا أمرك عجيب
وَحْدك انت جاوب ع نفسك يالبيب
وبتقول بدها البنت أجمل عندليب
بصوتو وجمالو يْرَقِّص الغصن الرطيب
ياما ابن عشرين مافيلو نصيب
يعشق صبيه ويلتقوا بعد المغيب
وياما كبير من التقى قلبو قريب
عندو جمال ومرجلة وصدرو رحيب
لَمّا الصبيه بْ قلبها بْ تعشق حببب
رح بسألك ياصاحب الوجه الكئيب
بتاكل عنب حصرم ع شكلك ياذكي
يما بتستطعم بحبات الزبيب
--------------------------
١٠- زاهر
-------------
مين للي قال العمر مفتاح الهوا
ومين ل. بيقول الخَتيرة ما بتلتوا
عرفتك بأول طَلعتك كِنا سوا
شبيين والعمرين عِشناهم غِوا
كِنت بزمان السَعد والهم انطوا
بوقت لي كان القلب عامر بالنوا
لو تقشع الحلوين ترفع مستوا
ت تزيد غنجات ودلع شِم الهوا
معتاد عا أكل العِنب لو لا استوا
بعد ما الشيب غرك وحظك لوا
ما بينفعك أكل العنب طازج ضَوا
رح تِقبَل زبيب العِنَب بِ للي حوا
لكن بعد خمسين عام من الزمن
صفا الوضع مرهوووون عا حَبة دوا
----------------------------
١١- مدين
---------------
الكلمه يازاهر زينها بميزانها
حتى تحافظ عارتم أوزانها
لما الردة يبتدي عنوانها
ب ذم وقدح مافيك ترفع شانها
ردات شِعرك واضحه بِ جْنانها
فيها سخافه وما زبط دوزانها
عْلقت بْ عَجينه وما طلعت عَجّانها
وعندك خميرة فاسدة بْ خَزّانها
وعاسيرة حبوب الدوا يافلانها
بتشفي قلوب مسكرة ب شريانها
وحبة يازاهر حِطها تحت اللسان
تا ما نذيع ب نعوتك إعلانها
------‐-----------------‐-------
١٢-زاهر
-------------
بِطلَع عن الموضوع لو مدين عَابها
وهالمَملكي سَهم الغَدر ما صَابها
وينك يا مدعي الصور وكتابها
ها لفلسفي ما بِدها حُجّابها
الكِلمة ل حَكَاها زاهر وع مْصابها
بتعرف انت واحد كنت من طلابها
لا تعتلي عالمملكة وأربابها
بعمرو الحِقِد ما أثّر عْلا عْتابها
كل البطولة ساجدة بمِحرَابها
منها الشمس غزلت خيوط تيابها
وجنودنا هالموت صار يهابها
حاجب انت واقف على أبوابها
ناطر أمير المملكي و حسَابها
عقلك خل ع ضرسك شلع من غير وجع
لو شفت زير المملكي بِدرابها
---------------------------
١٣- مدين
--------------
عْطيتك اشارة ومافهمت تحليلها
ولا اربحت مِنّي بالحوار جْميلها
خلي الرده لابسه إكليلها
وروح الشوائب من فْكارك شيلها
بحيثك زعيم المملكة عاجيلها
المفروض تنحت كلمتك ب زْميلها
وها لمملكه لاتعتني بتكميلها
رخصة بناء مخالفة من زيلها
عم حاورك حتى ما اكسر خاطرك
وماكنت ايدي تقبل بتقبيلها
---------------‐--------------------
١٤-زاهر
-------------
ن حاورتك وحاورتني هات الحَكم
يشوف المعاني الصادقة يشوف الحِكم
شاعر معي عا منبري علم وقلم
ضدين عا منبر شعر شَدوا الهمم
بوافق معك ياخصمنا كونك علم
ع دفاتر التاريخ عم تغني أمم
صادق انت والشاعرية والذمم
فيها اندمج توب الحلا انطق صنم
مدين على بواب الشعر شكلو رسم
أحلا صور أحلا معاني من العدم
جَمهورنا الليلة اغتنا وزع قُبَل
لأجلو انا غنيت و طلِعت القِمَم
---------‐------------
تعليقات
إرسال تعليق