مين فينا مات للشاعر المبدع ابراهيم علي
٠٠ مين فينا مات ٠٠٠
لما قالوا
ماتت أمك
حسيت كأني
مبنى آيل للسقوط
صرخت فيهم
غصب عني
يعني ايه
امي تموت
نديت عليها
صرخت فيها
والصرخة طالعة
بأعلى صوت
قالوا دي
هي الحقيقة
قلت الحقية
قبل أمي
كنت أنا لازم أموت
أما أحس إني حزين
وتشدني ذكرى وحنين
ليكي يارمز المحبة
وأما أفتكر لحظة وداعك
والفراق ساحب شراعك
ورياح الخريف وهي هابة
أبقى عايز أبنى لنفسي
اربع حيطان
وجوه منهم أستخبى
وأتمنى لو يعود الزمان
وتعودي يانبع الحنان
واشوفك بعيني
من تاني شابة
واجري وأنا
مشتاق اليكي
وأبوس ايديكي
وجوه حضنك آستخبى
واسألك مين فينا اللى مات
إنتي الدفى والذكريات
وبعدك جفا ودنيا باردة
بدور عليكي
فى كل الوشوش
وملاقي منك
غير رتوش
أصلك ياأمى
لوحة نادرة
٠٠٠٠٠٠٠٠٠٠٠
إبراهيم على
تعليقات
إرسال تعليق