التعايش للشاعر المبدع ميشيل رزق الله
التعايش
الشاعر : ميشيل رزق الله
... وانت يا إنسان وعايش
وسط عالم م البشر
يبقى لازم م التعايش
حتى تأمن م الخطر
خلِّي منهم ليك صديق
وتصاحبهم في الطريق
وتجاملهم عند ضيق
وتناصرهم .. كون شقيق
البشر دول نسل آدم
يعني إخوه ف نفس عالم
إوعى تكره أو تآلم
مش هايبقى ليك معالم
الفرح في القلب بيهم
الغرام منهم وفيهم
حِبُّهم وانت تلاقيهم
بيشيلوك جوًّه عنيهم
بالبساطه والتواضع
بالوداعه وتبقى طايع
تلقى كونك كله رائع
إدِّي خير طاقينه راجع
لو هاتتكبر تلاقي
كلهم عايزين بعادك
حتى ماتلاقي البواقي
حتى لو كانوا ولادك
خلِّي جوَّاك السلام
وابتسامه فوق شفايفك
وامَّا تنطق بالكلام
يبقى زي عبير في وردك
خلِّي بالك دا انت فكره
في العقول وبتندرس
يجري عمرك تبقى ذكرى
تتحمد أو تنهرس
وانت يا إنسان وعايش
وسط عالم م البشر
يبقى لازم م التعايش
بس ماتكونشي حجر
تعليقات
إرسال تعليق