رحلة للشاعر ابراهيم علي
٠٠٠٠٠٠٠【رحلة】٠٠٠٠٠٠٠٠
زي النهاردة من كم سنة
كنت زهرة سوسنة
وكان الشباب لساه ربيع
وفات الربيع وفضلت أنا
كان حالي حال كل الشباب
وكنت شاطر في الحساب
بس عمري ماحسبتهوش
ونجح الزمان ورسبت أنا
كان عندي الف والف حلم
والعمر مر كأنه فيلم
والسيناريو كتبه الزمان
والبطل كنت أنا
فيلم عادي وقصة مافيش
وصورة حلوة ع الأفيش
ووقت عرضة ماتلقيش
حد حاضر إلا أنا
والفيلم لسة مانتهشاش
والتكت كله ببلاش
واللي طالع ع المعاش
راح يحس بإنتعاش بدوري أنا
أصل دوري كان بسيط
لشاب قلبه كان نشيط
والحب فيه من غير حدود
والكل خان قلبي أنا
ورميت همومي في حضن شغلي
موظف حكومي وماشي دغري
وعشت عكس حلم صغري
والحلم ضاع مني أنا
مكتب وخلفه سنين عقيمة
لاليها طعم ولا أي قيمة
وحياتي مرت ك فيلم سيما
وكل المشاهد بطلها أنا
ومر عمري بالطول والعرض
وشفت نفسي بشاشة عرض
وكل الظروف اتفرضت فرض
والعمر صفق لي أنا
٠٠٠٠٠٠٠٠٠٠٠٠٠٠٠٠٠٠٠٠٠
إبراهيم علي
تعليقات
إرسال تعليق