حكيم يا حكيم للشاعر د.هشام فرغلي
حكيم يااا حكيم
دبرني يا ملك الحلول
تعبت كتير كتير من حُسن نيتي
وبصدق الناس بكلامهم المعسول
تعبت تعبت مِنّك يا دنيتي
المصالح عند الناس نستهم الأصول
ومن كلامهم وبكاهم بتنزل دمعتي
ولما ربنا يقدرني واقضلهم حاجتهم
يروحوا وما يرجعوا زي عادتهم
طب كانوا يطمنوني عاملين إيه في دنيتهم
ولا جايين بس عشان أفك ضيقتهم
لو زعلانين مني أروح أصالحهم
د أنا قلبي طيب وقلقي عليهم زاد
وما يشغل البال إلا القلق والبعاد
قولي رأيك وحكمتك ياحكيم
دول صادقين ولا منهم الكداب واللئيم
الحكيم :
اللي عايزك لازم هو اللي هيجيلك
تقضيله حاجته وبطيبتك تقفي جمبيه
مجروح ياعيني وينوح ويحكيلك
م هو لقى الطيب اللي راح يداويه
يخلص على بكاه علبة مناديلك
وأول م تفكي ضيقته ولا هتلاقيه
بس لما يتزنق تاني هينط ويجيلك
بذمتك ده واحد يستاهل تفكري فيه
متزعليش أبدا وأكتبي عن ندالته وغنيها في مواويلك
ولو قابلتيه صدفه أوعاكِ تنادي عليه
أصله ميعرفش المثل اللي بيقول شيلني يوم وأنا أشيلك
بس يعرف مثل اللي تغلب بيه العب بيه
أوعى ييجي اليوم وتندمي على مفاعيلك
ولا ييجي الوقت اللي تنسى ماضيه
هيفضل دايما جاحد وناكر لجميلك
د ناكر الجميل ربه وحده هو اللي يعلم بيه
** د.هشام فرغلي **
تعليقات
إرسال تعليق