لماذا للشاعر إبراهيم علي
٠٠٠٠٠{ لماذا }٠٠٠٠٠
أسهر الليل بطوله
أعد في النجوم
وأصحى الصبح بدري
أمشي من غير هدوم
وأروح الشغل ناسي
إن اليوم ده أجازة
سؤال واحد تاعبني
لماذا كل هذا
السحر والجمال
والحسن واللذاذة
عودك كالغزال
ياوردة جوه فازة
الفين مليون تحية
يامالكة نبض قلبي
بالشفعة وبالحيازة
ومن غير مااقول لماذا
محتاج جواب لهذا
أسمع حليم وثومة
وأعيش مع عود فريد
وأغني لأسمهان
بصوت عبد المجيد
وأشوفك أحس إني
خمسين رشدي أباظة
وسؤال واحد شاغلني
لماذا عيوني دايماً
شيفاكي كل هذا
القمرة جنب منك
تصبح ماليها عازة
ويموت الفل فيكي
والنرجس والبنفسج
يشيعوا الجنازة
والجوري والكامليا
يادوب انواع العطور
ويتعبو ف إزازة
اما إنتي ياحلوة دايماً
بمنتهى اللذاذة
وسؤال واحد شاغلني
لماذا كل هذا
٠٠٠٠٠٠٠٠٠٠٠٠٠٠٠٠٠٠٠
إبراهيم علي
تعليقات
إرسال تعليق