حارتنا العجوزة للشاعر د.ابراهيم علي
٠٠【 الفصل السابع ٠٠٠
حارتنا العجوزة فضاحة
ولابتجري مع الأيام
ولا بتمشي بالراحة
شعنونة وكركوبة
وخالطة الكذب
بصراحة
وعليلة ونمامة ونواحة
ولما وجعها يشتد
وقت الجد
تداوي روحها
بجراحة
في حارتنا تشوف
بالليل
خيال الفقر متجسد
كما المارد
وله أنياب واحساسه
كئيب بارد
ويقوم الصبح يتنصت
على الشبابيك
أصل الفقر في حارتنا
متأصل
ومتفصل ولابس شيك
وساكن في حارتنا النبوغ
والجهل
لان حارتنا ولادة وندادة
وكيادة
واي سؤال يدخلها كما العادة
يطلع سهل
وفيها الناس من النجمة
تقوم تجري
وده لسة مش فايق
وده رايق
ودي بتدعي لأولاده
من بدري
وده يدحرج صباح
الفل
وده يرمي السلام
على الكل
خلية نحل في حارتنا
تشوف فيها النشاط
في عراك
ومخلوط فيها العسل
بالمر
وأشطر تاجر في حارتنا
بتاع الفول
صباح أو ليل دكانه لايمكن
يكون مقفول
أصل الفول في حارتنا
أمين وأمان
من غيره مزاجنا يتعكر
كما الإدمان
جميلة حارتنا وقبيحة
في أن واحد
فيها المنصف جوار ظالم
وفيها القانع قصاد جاحد
٠٠٠٠٠٠٠٠٠٠٠٠٠٠
إبراهيم علي
تعليقات
إرسال تعليق