أنا المصري للشاعر سيد المبروك
انا المصري...
كلماتي / سيد المبروك
و أداء استاذي العزيز الشاعر المبدع الأستاذ
سامى عبد الحى
بعد العمر و سنيه لقيت العمر مد
وانا المحتار ما بين الغربه و تاه العد
انا اللي تاريخي لما درسته قواني
و لما عشت تاريخ بلدي لحلمي هد
انا المصري و معروف كما النجمات
انا النيل .وانا الأزهر ..انا صوتي كما الرعد
انا اللي عبرت ف عز صيامي و سينا دليل
انا اللى رفعت رايات النصر ف يوم السعد
و راح عمي فداه دمي وخالي شهيد
فدائي أصيل اكيد يابلادي و اد الوعد
انا العامل فوق رصيف الأمل...
ف ايدي الفأس وازمه حديد و عزمي بشد
انا الدكتور وانا القاضي ف منصة عدل
انا الفلاح و من ايدي بياكلو الشهد
انا العقاد وانا شوقي على شطى..
انا المصري تاريخ وحضاره كريم اليد
انا اللي زرعت مع يوسف سبعه ثمان
عملت حساب لسبعه عجاف و قمحى يرد
فريد من نوعي وقت المحن سداد
وسط النار بترمي بصنع من لهيبها البرد
بدايتي سعيده أو حزينه عايشها
طفوله وصبا و شباب من المراحل عد
بنام احلم وبرسم ف الخيال زمني
و بصحى بلاقى زماني قصادي ضد
انا المصري اللى نام ف ضلمة ليل
انا بصرخ ف دنيا غريبه وفين الرد؟
انا اللي قالولي دا بكره جميل واستني
و فات عمري وانا دموعى مصاحبه الخد
انا اللي ربي كرم ارضي و مدحها مدح
يا ريت لو يوضع كل غشيم لحقده حد
انا اللي ياما شوفت ملام من الأغراب
ليه يا بلادي نسياني ..و مني الود؟
دايما بقدم الاحسان و الصبر من طبعي
و ايدي ف كل مكان بتعمر وتبني بجد
انا المصري ..فارس ف كل ميدان
انا اللي عرقي بيروي ارضي ويطرح ورد
حقود القلب لو يرجع بالزمن يوم..
كان رسمنى تمثال اثري بيصنع مجد
#شاعر_القمر
سيد المبروك 🇾🇪
تعليقات
إرسال تعليق