ماظل صبر للشاعر د.سيد محسن الموسوي
((( ما ظل صبر )))
عمري ايعـّدي.......أتمّر أعوام
وجسمي امعلعل.......كلّه آلآم
ابحسره وآه.....اتذكّر وانحب
بحزني الأصفه...لحالي اولام
ارسوم الذكرى اتشتت فكري
تـاخذ بيّـه .....لـصوب اوهـام
اذكـر اهلي........ ومهد اصباي
واذكـر ربعـي......وذيـچ ايـام
اعليها اتحسر..واذرف دمعـي
وسفه الصارت.....كلها احـلام
ويمر ليلي .....وآنــه وروحي
ابغم نتنادم...........چذب إنّـام
نتواسـه انـوّن......طـول الليـل
ايهيّج بينـه.......الـجرح الـدام
ما ظـل صبـر.....البينه ايهـّدي
الدهـر اعلينه........شد احـزام
أشسويت آنـه...لدهري الجاير
وشنهـو الـذنب.......ويـا آثــام
شنهو اجناتي...وروحي اتنوح
تزيـد أحزاني..........عـام ابعام
وذاك الشامت...فرحان اصبح
يـحچي ابحقده.....ذمني ولام
مو بس هوّ...........ولفي اوياه
اتناسه أحبابه.......وعان الـذام
طـبع النـاس.....أشمالـه اتغيـّر
منهـم اشكـي.........لـرب عـلام
آنـه اتلـوّه.......ابحزنـي وهمـي
وجلبابي اصبح......اسود خـام
سلمت امـري.....لـواحد راحـم
وهن ابداني......وصرت اعظام
د. سيد محسن الموسوي
تعليقات
إرسال تعليق