الحقيقة الكاملة للشاعر د.عبد الحميد وهبه
( الحقيقة الكاملة )
إوعاك تجرّب مرة أو تعمل محاولة
إنك تشوف في يوم حقيقة حد كاملة
سيبُه هتظهر يوم حقيقته لوحدها
وتبان عليه فعلاً أكيد بعد المعاملة
تعرف صحيح لو كنت صح في اختيارك
من غير ما تعرف فجأة هتحدد مسارك
يومها أكيد راح تصدر إنت عليه قرارك
قرار أكيد مافيهوش رجوع ولا فيه مجاملة
إوعاك تجرّب تعرف الحقيقة كاملة
إوعاك تحاول يعني يوم تعرف حاجات
مصيرها ميت أو في طي الذكريات
العِلم بيها أكيد لا ينفع أو يفيد
فالأحسن إنك يعني تبعد من سكات
جايز كمان بالعكس ده اللي يضرّك أكتر
وإن الخسارة بعدها راح تصبح أكبر
والحيرة والفِكر اللي كان عليك مسيطر
يبقى السبب في الإنهيار بعد الثبات
طول ما الحقيقة الكاملة عنّا متدارية
هنعيش حياة سهلة وبسيطة قوي وعادية
لكن في أول يوم تحاول يعني تفهم
هيكون ده أول خطوة في طريق الأذية
بس الأذية أكيد هتبقى للجميع
وإن المحبة والإحترام جايز يضيع
هتحس يعني بعدها بإحساس فظيع
إن حياتنا خلاص أكيد مابقتش هي
بقلمي عبدالحميد وهبه
تعليقات
إرسال تعليق