أنادي روحي للكاتبة دنيا ابراهيم
{أنادي روحي}
يا روحي... يا تايهه مني،
يا نفسي... يا اللي مخصماني،
يا ذاتي... يا اللي معانداني.
بتحكوا وتقولوا كلام،
ومش عجبكم، عارفة الحال.
وأنا سامعة وساكتة،
بسبب لساني الجبان،
نفسي أقول كلام،
بس مخروس... وعليه لجام.
قولّي يا نفسي... أعمل إيه؟
ترُدّ عليّ وتهمسيلي:
اعملي نفسك مش واخدة بالك،
وقومي اطبخي حاجة لعيالك.
ذاتي الراقية مش عجبها الكلام،
وتقول: "إنتِ ملكة،
ويجيلِك خدام."
آه يا ذاتي، يا غلبانة،
ارجعي مكانك، وقولي:
"آه يا أنا...
وسبيها تعيش،
وتصبر هي،
لا هتتكلم ولا هتقول."
ويوم هيمر...
ووراه يوم.
آه يا نفسي،
وآه يا ذاتي،
كلامكم كله أثر فيَّا.
هلف وأدور على كياني،
يمكن ألاقي عنده الحَل لحالي.
يمكن يرجّع لي روحي،
اللي معاها كل جروحي.
أدويها...
وأفُكّ لجام لساني معاها،
يمكن وقتها...
أقدر أعيش،
وأتحمّل.
بقلم وريشة: دنيا إبراهيم
تعليقات
إرسال تعليق