ألم الفراق للشاعر د.سيد محسن الموسوي
(( ألم الفراق ))
حرت شحچي شأگول امنين آنه ابدي
ابدي من زماني الجار ...لو عِله الولت چبدي
لو همي الما تشيله احيود هد الحيل
لو فرح الجفاني وصّد بحدوده انذبح سعدي
لو راسي التشوفه العين مغزي ابشيب
لو ايدي الغدت تخفج وبعگلي الشدِه يحدي
لو گلبي الصبح مجروح عيب ايطيب
لو سگم اللفه لعضاي وجروحي الصفت تدي
واهن تيّهت دربي والأوهام تبرالي
عذبني الدهر ما كف وطغيانه گصه ابحدي
ناحل سلوتي ونّي والحيطان تچاتي
ابعيني زِغرت الدنيا.....واصفه الحال متردي
صرت آنه الگطب...والهّم عليّه ايدور
جافيت الفرح مجبور..... وياه انحسم عهدي
چم حسبه التمر بيه وأجر حسرات
أعزّي الروح اصبّرها .....اگولن شدّه واتعدي
چاذب اضحك لغيري اخاوي احزان
لوّن اتصبها عالفولاذ.... چا لان وبده ايصدّي
آه...دنيانه مشت بالمگلوب ما ترحم
تبث اسمومها التكتل..... ابفاتكها إلي اتودّي
تدريني بشر من دم ولحم يا ناس
حملنّي الإله احساس..وجفني لحالتي اينّدي
منهو اليشبه لحالي....افگدت شجره
فيّها امظلل لبيتي..... وجنيت اثمارها ابيّدي
وردتّي الچنت اشمّنها وعطرها أيفوح
آذاني الدهر يا حيف.....وبغفله خطف وردي
خلانّي اوّن.....نوبـه ايعكر احلامي
وأخرى ابيقظة الاحزان.....يأخذ بيّه وايودي
سوّاني مثل نـاعـور.....بيـّه ايدور
ما كفه العِمل ياناس.....گام اينّخب ابعضدي
خطف مني شريكة روحي وانفاسي
عزيزة أولي وختمي......حبيبه امخلّده عندي
اگصدها ابألم وبآه..بدموعي اگربلها
أصيح بصوت يحبيّبه.اجيتچ گاصد ابوجدي
اطيحن عالگبر صارخ آنه المفجوع
محبوبچ صِبح عندچ........ويحبيبه عليّ ردّي
حبچ بـالگلب غافي وغطـاه اوفـاي
چذب اليوصل لحدّه.....خايب من گصد ودّي
وهن حيلي..وعصّاتي صفتلّي العون
اضحك چذب للمجبل......عگبج لافرح يجدي
خاشع..ادعي الخالق المعبود واتنخـه
الهمني الصبر يارب.........وعزّز قوتّي وشّدي
د. سيد محسن الموسوي
تعليقات
إرسال تعليق