نفسي للشاعر د.ابراهيم علي
نفسي في عام يكون قديم
استخدموه الناس زمان
لما كان الضمير سليم
والأصول عند الجيران
والأقارب كانت تزورنا
والحلال ساكن صدورنا
والحرام ملهوش مكان
لما كانت الشقة أوضة
وصالة واسعة بالحنان
لما كانت الأنثى زوجة
وصوتها أشبه بالكمان
تعزف الكلمة بمحبة
تنتعش ليها الودان
اما كان الزوج أصيل
رحيم في بيته ع العيال
مهما شال من حمول
كالهرم واقف مامال
نفسي في عام من بتوع زمان
ولا عايز فيس ولا عايز نت
ولا تليفون مع واد ولا بنت
نفسي يرجع ويعود زمان
أيام ماكانت الكلمة وعد
أيام ماكنا بنحب بعض
ومع الصديق سري في أمان
نفسي في عام يكون قديم
من بتاع شادية وحليم.
وفوازير لنيللي وشريهان
وسمورة وعمو فؤاد
وعالم البحار والعلم والإيمان
نفسي اصحى الصبح بدري
على هنا القاهرة في الراديو
وأغاني لوردة واسمهان
نفسي اسمع همسة عتاب
وبرنامج كان ياماكان
نفسي اسمع أجمل حروف
وقال الفيلسوف وكلمتين وبس
نفسي يرجع بينا الزمان
لليالي الحلمية واربيسك وزيزنيا
وجمعة الشوان ورأفت الهجان
نفسي اسمع لخواطر الشعراوي
وصوت الحصري والمنشاوي
في إذاعة القرأن
نفسي في عام من بتوع زمان
٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠٠
إبراهيم علي
تعليقات
إرسال تعليق