إستقالة للشاعر د.عبدالحميد وهبه
( إستقالة )
أنا م النهاردة أنا من حياتك مستقيل
مش هرضى يعني لقلبي تاني يعيش ذليل
شكراً على الحب اللي ضيّعتُه بإيديك
شكراً على الجرح اللي كان رد الجميل
وأنا قلبي بَعدك بكره ربي يعوّصُه
وأي جرح من النهاردة أنا هرفصُه
إختار لقلبك اللي ممكن يسعده
مع إن صعب تلقى غيري في يوم بديل
أنا م النهاردة من حياتك مستقيل
أنا عشت عمري بحالُه جانبك زي ضِلّك
لا في يوم خدعتك أو في يوم فكّرت أضلّك
شوف بعد ما أمشي ولاّ أبعد يعني عنك
مين ده اللي بعدي هيبقى جانبك أو فاضلّك
قررت أبعد يعني وأنا كلي إقتناع
إن اللي يهمل حد أكيد زي اللي باع
مش شرط أن يكون عاملته بالخداع
لكن تجاهله كان أكيد أكبر دليل
أنا م النهاردة أنا من حياتك مستقيل
وفر كلامك ده العتاب مابقاش يفيد
أنا م النهاردة خلاص باقيت واحد جديد
غير اللي عاش العمر كله جانب منك
أنا شخص تاني ماتعرفوش فعلاً أكيد
قدمت روحي ليك أنا وماكنش عاجب
وحاجات بيحلم بيها أي إتنين حبايب
لكن بعد اللي آسيته معاك وشفتُه
ف الإستقالة من حياتك أقل واجب
بقلمي عبدالحميد وهبه
تعليقات
إرسال تعليق