سكندريات للشاعر د.ابراهيم علي
٠٠٠ " سكندريات " ٠٠
بحب لون البحر جايز
أروح إليه وأبقى عايز
أغوص في قلبه في أي حين
أصل لون البحر يبهر
كأنه دجال بيسحر
والسحر صابني بالحنين
بحب شكل الموج وممكن
لأنه عالي وع الشط يركن
ذكرى حلوة من سنين
بحب شكل الصخر لَمّا
لما أنزل واستحمى
إن كان شماله أو يمين
بحب رمل البحر عادي
أبني فوقه وهو نادي
قصر عالي وشكله زين
بحب سور البحر حارس
القوارب والنوارس
والصيادين الطيبين
بحب كل البحر لأني
أنا حته منه وهو مني
زي أبويا وأخويا وابني
وغيره يعني أحب مين؟
٠٠٠٠٠٠٠٠٠٠٠٠٠٠٠٠٠٠٠٠٠٠
إبراهيم علي
تعليقات
إرسال تعليق