مرايا الغدر للشاعر د.زهير العسكري
يسرني أن أقدم لكم آخر اصداراتي من الشعر الشعبي العراقي بعنوان👇 أتمنى أن تنال إعجابكم .
( مرايا الغدر )
أدورك بالوجــوه وضــــــايع الـمنـظــار
وإجت ريـــــــح الغرب بتراب وعموني
عشرتي ويــــــاك تگطر مـــن كتر فزاع
ومن گد هــــــل المواقف كثره عادوني
عفتني ومن رحت هَمْ روحي منهه نشال
وعلى درب المنيه دموعي ماشـــــوني
أنـه الممنون الك لو جرحي يشفه بساع
لـچـن جرحـك كبــر وبجرحي ذلــــوني
شلت حملك عمر ما گلت چتفي انصاب
ومن طـاح الحمل شو ربعي شتموني؟
چنت أفرش رموشي لـــخطوتك يفلان
هسه اعــــله الرمـوش جـروح داسوني
بنيت آمالي بيــــــك وگلت سـدي العان
أَشـــــو سـدك فطر والــناس شـافوني؟
أما هزك ضميـــرك من بگيــــت وحيد؟
ولا ذكريــــــــته ودِّي لأجـلك وكـــوني
دخيل الله الغدر گطع نيـــــاك احشـاي
تمرتع بيــهه چــــانت لك شبه (جوني)
أضن طبع الغدر قــــــانون صـــاير بيك
لعد هــــــــــاك اسـتعد قــانوني غيَّــرته
نويت أرحل غريب ومــــــــا أرد لـديار
وبعـد هيهات اثق جسر الـــيمر فـجرته
صـرت لوحة حزن مرسومه بالأوجـاع
وعلى حيطــان غدرك أسمي علــگــته؟
وساجي الصبخه ناطر منهه عود الياس
غشيــــــــم وياسي ميت ما خضر نبته
أهو العاشر حيــــــايه التبن بيت احزان
إذا مــــــوش الصبـــح ظهــريه لادغته
وإذا طولت كلش حد لهيـــــب الگيـض
نفيـــث اسمومهن كـــــافي بكسر جرته
أنـه المِثلي جبل مــــا هزني ريح الخان
وإذ جرحـــــي كُـبَـر بالـــصبـر صـبّـرته
وانهض من جديد اكسـر جناح الخوف
والبـــــــاع العـمر من دفتـري مـسحـته
لتخاوي الـرخيص وترجى منه اســـناد
تـرى طـبع الـردي بـأول ضـيـج يـتـبـرّه
والمـا صـان ملحـك لا تـظن بـي طـيـب
مـثل سـم الحيــــــايه بـوجـهـك يـطـرّه
شـد حـيلـك لـنفسـك والـثـقه المـيـــزان
ولا تـنـطي الـثـمـيـــــــــن لـوادم مـغـرّه
اليبيعـك بـاللحظ بيعه انته رخص تراب
وعـشـرتـك ناكر الهه بـهـــــــالـدرب ذرّه
تخـل گـلبك صخر ويصد هوى چوريد
ترى اليـغـلط غلط إيعيـــــــده الف مرّه
تطـهر ذكريـاتـك مـن وجـــــوه الـزيـف
والـعـاف الـوفـه ( مَسْ ) او طــلع بـرّه
وإذ جـــــاك الـنـدم يـتـعذر بـدمـعــات
تسـد بـاب الـصـلح والـخـــان لا تـمـرّه
بحر تترسه ابجره اولا تصـخ لك هام
نصيحه من الذهب محطوطه بالجرّه
زهير العسكري
تعليقات
إرسال تعليق