دبيبة ندامه للشاعر د.زهير العسكري

(( دبيبة ندامه ))

بكل شيبه التلالي.. ابوسط فروة راسكم

تتبدّه مناره..

وكل تجاعيد الوجه.. يغفى بظلهه تاريخ وهوى!

،

ودمعة أمي تفيض كوثر..

تغسل ذنوبي الچثيره..

يا طهر ذاك الدعا.. الما يوم عن عيني انزوى!

،

ويا اهلنه..

شگد حملتونه بنعش وافر صبّركم؟

ولسّه ما خلصت دروبي.. وآنه كل حيلي انطوى!

،

يا وجعكم..

يا سهر ذيچ الليالي..

الباگ من عمـر العزيز.. شگد ورد؟

وآنه غافل وسط ثوبي.. وما حسبيت حساب عمري لو نوى!

،

چنت أظن الدنيا سهله..

والرغيف اليصل چفي..

نازل بغيم السما!

،

وما دريت الوالد يگص من صِفاحه..

ويشتل بچفيني جاه..

يعصر سنينه بلموّجه.. ويشعل عيونه ضواه!

،

وچانت امي تگول شمعه..

تحرگ ايديهه لجلنه..

تگول: "يمّه العافيه الكم تلوگ.. والوجع بِيّه استواه!

،

وشكثر سولفتو بإذني..

عن حلال وعن حرام..

وعن درب مابيه ملام..

وچنه نملّ من حچيكم.. ونرفض الراي الثجيل..

وهسه من صرنا بمچاينكم.. عرفنه الحِمل شگد كلف!

،

فزّت جروح العگل..

وضوگ الصبر شفناه مرّ..

وچلمة (أوليدي) أحسّهه بصدري خنجر.. محترف!

،

كون يرجع بينه الماضي دقيقه..

واركض اشبگ شيبكم..

وألثم آثار الجدام.. الچانت تطيح وتگوم..

حتى ما نغفى بظلام!

،

يا صفعكم..

الچنت اظنه قسوه توجع..

طلع صرخه.. لا تطيح..

وهو سچّه وخارطه.. لكل من يريد يمر صحيح!

،

كافي شربتني الندامه..

وآنه تيهتك يا ماي.. وبعد ما يرجع ضواي..

شما كبر واهس وليدي.. أذكر حچاية (يبوي) واستريح!

،

الچنت اردّنهه بدلع..

هسه ردت لي بدمع.. وكسرت بصدري ضلع!

،

بيدي ضيّعت الدرب.. الچان يرشدني عليكم

شلون اعتذر وكتي فات؟

و(دْبيبة ندامه ) البيه صاحت:

الراح ما يرجع يا غافل.. لو تشب روحك لهب!

،

عود يمته؟

انرد نلم جرح المحنه.. ونغسل الروح بهواكم؟

يا حسافه..

باگنه الموت وخذاكم..

الموت باگ الماي كله.. وشحّت الدنيا بضواكم!

زهير العسكري 

من الشعر الشعبي العراقي الحر.